امهاتى

امبارح ولاول مرة بناتى يبعدوا عن حضنى ليلة اه ليلة واحدة بس بجد اطول ليلة فعمرى لحد دلوقتى الليل مكانش راضى يمشى مش عارفة اعمل اى حاجة عاملة زى العيلة الصغيرة اللى خطفوها من اهلها محتاسة وجسمى كله واجعنى وماليش نفس اكل قررت ان ايه العبط ده يلا قومى كلى حاجة قومى اعملى اى حاجة معرفتش احتست طيب انا كنت باكلهم ازاى وانا مش عارفة ااكل نفسى اخدتها من قصيروا وروحت قعدت قدام التليفزيون لقيت نفسى بجيب الكارتون طيب ما انا بتخانق معاهم طول الوقت علشان بزهق منه حاولت ادور فالخمستلاف قناة الاقى نفسى برجع له تانى المهم عدى كتير من الوقت خلاص معاد انى اروح اجيبهم من عند جدتهم قرب لبست ونزلت بدرى بصراحة زهقت طيب همشى شويا اضيع وقت لا مش قادرةوقفت تاكسى وروحت بسرعة جبتهم واول ما شوفتهم اخدتهم فحضنى وفضلت ابوس فيهم وهما كمان ولقيتهم هما كمان مش ناموا كويس مش اكلوا كويس ولما سالتهم ليه قالولى كنا قلقانين عليكى اوى و عارفين انك مش اكلتى لانك مش بتحبى تاكلى لوحدك فقولنا هنستنى لما نروح معاكى ونتغدى وروحنا ودخلوا يغيروا ولقيتهم بيقولولى انتى مش عملتى اى حاجة فالبيت كل حاجة زى ما هيى قولتلهم معرفتش طول ما كنتوا بعيد مكنتش عارفة اتحرك لقيتهم بيحضنونى وقالولى احنا كنا عارفين وعلشان كده كلمناكى بليل لاننا قلقنا عليكى ومهما حصل مش هنسيبك تانى علشان مش تخافى وفجاة اكتشفت ان عندى اميين صغيرين وعرفت اد ايه حياتى من غيرهم ولا حاجة وان اى حاجة غيرهم فحياتى متسواش جنب حضنهم اى حاجة